7. इस्राऐल नें हातें परमेश्वर नीं वायदों
परमेश्वर वें जरां इस्राएलियां नें लाल दरियों पार कराव दे दों, तरां डोगोर मं सीनें नामक पहाड़ नें अगळ इस्राएलियां वें डेरां दड़ां। तरां अणवें डोगोर नें हातें डेरा ऊबा करां हें ।परमेश्वर वें मूसा थकीं केदूं कें इस्राएलियां नें कें दें, हावूं तमों मारीं वातं नें मानहों अनें मारीं वासों नों पालन करजों तें हेथं मनखं तमों मारीं खुद नीं परजां केवाओं हों , आखी दनियां तें मारी हें अनें तमों मारीं नजरा मं याजकों नूं राज अनें पवितर जात केवां हों । अनें ताण दाड़ं होदूं खुद आपड़ां आप मं आत्मां मं तेयार थाओं , जरां परमेश्वर वें सीनें नां पहाड़ माथें आवें तरां वादळं गाजें अनें विजळीं समकहें अनें डोगोर नें माथें काळों थायें जायें, फेर हनाऐयां नों मोटों शबद हमळायें हें । अनें मूसा नें डोगोर नें माथें जावां नीं इजाजत आलेलीं हेथीं।परमेश्वर वें अणनें वासा आलीं अनें केदूं '' हूं तारों परमेश्वर यहोवां हूं ,जीं तनें गुलामीं नां घेर माहो अनें मिसर देश माहो काडे लायों हें ।''''तूं मनें सोड़ेनें बीजा ईश्वर नें नहें मानतों वेंहें।''मूं तारां परमेश्वर नें हारुं कोय मूरत खोदें नें नहें बणावतों वें, अनें नहें केनीं पूतळीं बणावजें , अनें तारें ऐनीं पूजां नहें करवां नीं , केम कें हूं तारो परमेश्वर यहोवां रिं राखवां वाळों परमेश्वर हूं।''तूं तारां परमेश्वर नूं नाम अमथूं नें लेवां नूं अनें ''तूं दितवार नां दाड़ां नें पवितर राखें नें अयाद करजें, सों दाड़ होदों तारां हेतां काम-काज नें करजें। पोण हातवों दाड़ों परमेश्वर यहोवां नें आराम नों हें।''तूं तारें बां अनें आई नीं इज्जत राखजें , अनें तारें लोई नहें करवां नूं , ''तूं सेनाळीं नहें करतों वें ,''तूं चोरीं नहें करतों वें अनेंं ,तारें केनेंं हामीं झूठीं गवाहीं नहें आलवीं अनें तूं कणां घेर नीं लालस नहें करतों वें, अनें न तों कणीं बइयेर नीं लालस नहें करतों वें।परमेश्वर वें आं दस कायदां मूसां नें भाटां माथें लखें आल्यां।परमेश्वर वें अजूं यें घणंस नियम अनें कायदां नें पाळवां नूं अणनें केदूं। आं मनखं कायदां नें पाळहें , तें परमेश्वर वें ऐनीं वासा नें केदां माथें आसीस आल्हें।परमेश्वर वें इस्राएलियां नें डेरां बणावां नीं हिक आलीं । अनें इं मिलाप वाळों डेरों केवायें हें , अनें ऐनें मयतां बेयं कमरां , जेनें मयतों ऐक मोटों परदों अलग करें हें , अनें मोटाम-मोटा याजक नें जावां नूं अधिकार हेथूं , केम कें परमेश्वर ऐनें मयं वास करें हें।अनें कोणें भीं परमेश्वर नां कायदां नें मानहें , इं मिलाप वाळां डेरांनें हामों वेदीं नें माथें परमेश्वर नें हारुं ढान्डं नोंं बलिदान सड़ावहें ।ऐक याजक ढान्डं नें मारें नें वेदीं नें माथें बाळहें अनें तेनां ढान्डां नें लोई नूं बलिदान सड़ाव हें इं पापीं मनखं नां गुनाह नें माफीं आलहें।परमेश्वर नीं नजरां मं परमेश्वर वें मूसा नें अनें ऐनां भाई हारुन अनें हारुन नां वंसज नें याजक नां पद हारुं टाळें लेदां हें ।हेतां कायदों नें इस्राएली मनखं वें मान्यं जीं परमेश्वर वें अणनें आल्यां हेतां । अनें परमेश्वर नींस भक्तिं करजों अने ऐना शरणां मं खास मनखं बणेलं रेजों। परमेश्वर थकीं वासा बान्धी ऐनां थोड़ाक समय बाद मं अणवें खतरनाक अपराध करयां।घणां दाड़ां थाई गयां मूसा सीनें पहाड़ नें माथें परमेश्वर थकीं वातें करतों रयों । मनखं मूसा नें पासों आवें नीं वाट जावेनें नें थाके गयां। मनखं हारुन कनें होनूं लेन आयं अनें केवां लाग्यां कें अमारा नें हारु देवतां नें बणाव। हारुन वें होनां थकीं ऐक बसड़ा हरकीं मूरत नें बणाव दे दीं। मनखं तणीं मूरत नीं भक्ति करवां लाग्यां अनें ऐनें हारुं बलिदान सड़ावां लाग्यां। अने परमेश्वर अणं थकीं घणों रिं मं आवें गयों , अणनां पाप नें हारुं अणनें खतम कर देवां नों उपाय होदयों , मूसा वें परमेश्वर थकीं दूवां करीं अनें मूसा नीं दूवां नें ग्रहण करीं अनें अणनें खतम नहें करयां। अनें जरां मूसों पहाड़ थकीं नीसं आवे नें अणें तणां देवतां नें देख्यों , तें एनों गुस्सों भड़कें गयों, अनें पाणां नीं पाटलियां नें नीसं दड़ें नें तोड़ दड़ीं केम के इं परमेंश्वर नां दस कायदां नें विरूद्व मं हथीं।तरां अणनां बणावलां बसड़ा नें लेंन आग मं दड़ें नें बाळ दे दूं। अनें ऐनें तोड़ेनें बटका-बटकां करें दड़ां अनें पाणीं नें माथें फेकें दे दूं। अनें इस्राएलियां ने पायें दे दूं । परमेश्वर वें घणीं मोटीं विपतीं दड़ीं जेनें थकीं घणं मनखं मरीं गयां ।मूसा डोगोर माथें फेर गयों अनें अणें दूवां करी कें परमेश्वर अणां मनखं नां पाप नें माफ कर दें। परमेश्वर वें मूसा नीं दूवां नें हामळीं अनें अणनें माफ कर दें दूं। अनें मूसा वें पेल वाळीं पाटलियां नें वाणयं बेंय बीजीं पाटलियां नें घड़ीं केम कें पेल वाळीं पाटलियां नें अणें तोड़ें दड़ीं । तरां परमेश्वर वें इस्राएलियां नें सीनें डोगोर थकीं वासा नीं जगां माथें मोकल्यां।
बाइबल नीं वारतां मं निरगमन 17-34
